උණුසුම් පුවත්

පාස්කු ප්‍රහාරයේ මහමොලකරු ගැන FBI අනාවරණය මෙන්න..

පාස්කු ප්‍රහාරයේ මහ මොළකරු නවුෆර් මවුලවි බවට ඇමෙරිකාවේ FBI ආයතනය පවා තහවුරු කර ඇති බවත් එම ප්‍රහාරයට සම්බන්ධව එක් විදේශීය ජාතිකයෙක් අත්අඩංගුවට ගෙන ඇති බවත් අමාත්‍ය සරත් වීරසේකර මහතා අද (19දා) පාර්ලිමේන්තුවට පැවැසීය. ප්‍රකාශයක් කරමින් ඔහු සඳහන් කළේ තවත් මාලදිවයින් ජාතිකයන් 4ක් පිළිබඳවද පරීක්ෂණ පවත්වන බවයි. පාස්කු ප්‍රහාරයේ විමර්ශනවලට අදාළ උදෘත සම්බන්ධයෙන් නීතිපතිවරයා පෙන්වා දුන් අඩුපාඩු මේ වන විට ඉක්මනින් නිවරදි කිරීමට කටයුතු කරමින් පවතින බවද ඔහු පැවැසීය.

මෙම ප්‍රහාරයට අදාළව මේ වන විට පුද්ගලයන් 32කට එරෙහිව නඩු පවරා ඇති බවත් නඩු පැවරීම ප්‍රමාද වන්නේ මෙවැනි ප්‍රහාරවල විමර්ශන ඉතාමත් සියුම්ව සිදුකළ යුතු නිසා බවත් ඔහු පැවැසීය. වත්මන් රජය කිසිය ආකාරයකට අන්තවාදයට හා ත්‍රස්තවාදයට හිස ඔසවීමට ඉඩ නොදෙන බවත් පාස්කු ප්‍රහාරය වඩා දරුණු ප්‍රහාරයක් එම ප්‍රහාරයෙන් අනතුරුව තවමත් සිදුව නොමැති බවත් ඔහු පැවැසීය. පොලිස් පරීක්ෂණ අනුවත් ඇමෙරිකානු විමර්ශන අනුවත් පාස්කු ප්‍රහායේ මහ මොළකරු නවුෆර් මවුලවි බවට හඳුනාගෙන ඇති බවත් ඔහු පැවැසුවේය. අයි.එස්. මතවාදය ලංකාවේ ව්‍යාප්ත කිරීම, අයි.එස්. පුහුණුව ලබාදීම, නුවරඑළිය හා හම්බන්තොට පාසල් අධීක්ෂණය කිරීම නවුෆර් මවුලවි විසින් සිදුකර ඇති බවත් අමාත්‍යවරයා සඳහන් කළේය.

කෙසේ වෙතත් නීතිපති දප්පුලද ලිවේරා මහතා ප්‍රකාශ කළේ පාස්කු ප්‍රහාරයේ මහ මොළකරු නවුෆර් මවුලවි නොවන බවත් ප්‍රහාරයට අදාළව කුමන්ත්‍රණයක් ක්‍රියාත්මක වූ බවත්ය. එසේම එම ප්‍රහාරය පසුපස සිටි විදේශීය ජාතිකයන් තවමත් හඳුනාගෙන නොමැති බවත් නීතිපතිවරයා සිරස නාළිකාව හා සාකච්ඡාවකට එක්වෙමින් පැවැසීය.

උණුසුම් පුවත්

ලංකාවේ ක‍්‍රිකට් විනාශ කලේ මහේල-සංගක්කාර.. ඔවුන් ක‍්‍රීඩා කලේ වාර්තා වෙනුවෙන් – අර්ජුන

ශ්‍රී ලංකාවේ ක්‍රිකට් කඩාවැටීම ඇරඹුණේ දෙවෙනි කුමාර සංගක්කාර හා මහේල ජයවර්ධන හේතුවෙන් බව ශ්‍රී ලංකා කණ්ඩායමේ හිටපු නායක අර්ජුන රණතුංග මහතා සඳහන් කරයි.

මහේල සංගක්කාර ක‍්‍රීඩා කරන කාලයේදී දෙවැනි පෙළක් නොහැදීම හේතුවෙන් අද තත්ත්වයට ක්‍රිකට් කඩා වැටී ඇතැයි ද ඔහු කියා සිටී.

ඔවුන් රට වෙනුවෙන් ක්‍රීඩා කළේ නැති බවත් තමන්ගේ වාර්තාවන්ට පමණක් ක‍්‍රීඩා කළ බවත් රණතුංග මහතා පෙන්වා දෙයි.

වත්මන් ක්‍රීඩා අමාත්‍ය නාමල් රාජපක්ෂ මහතාද ෆේල් වී ඇතැයිද පවසන ඔහු බාප්පා ජනාධිපති තාත්තා අග්‍රාමාත්‍යවරයා වන නාමල් රාජපක්ෂ මහතාට ක්‍රිකට් හදන්න නොහැකි නම් වෙනත් කිසිවකුට නො හැකි බවත් කියා සිටී.

අන්තර්ජාල නාලිකාවක සාකච්ඡාවක දී ඒ මහතා මෙම අදහස් පළ කර ලදී.

2024 දී පොදු අපේක්ෂකයා තමන් විය හැකි බවද පවසන ඔහු තමන් ඊළඟ ඉම්රාන් ඛාන් වේවි යයි සියලු දෙනා තමන්ට බිය වී සිටින බවද එහිදී කියා සිටියේය.

උණුසුම් පුවත්

මුරුත්තෙට්ටු හිමිගේ ඉල්ලීම් හතෙන් පහකට ජනපතිගෙන් එසැණ විසඳුම්..

රාජ්‍ය සේවා එක්සත් හෙද සංගමය ඉදිරිපත් කළ ඉල්ලීම් හතෙන් පහකට එසැණ විසඳුම් ලබාදීමට ජනාධිපති ගෝඨාභය රාජපක්ෂ මැතිතුමා පියවර ගනී. ඉතිරි ඉල්ලීම් දෙකට අදාළ විසඳුම් මීළඟ අය වැයෙන් ලබාදීමට ද ජනාධිපතිතුමා එකඟතාව පළ කළේය.

රාජ්‍ය සේවා එක්සත් හෙද සංගමය සමඟ අද (02) පස්වරුවේ ජනාධිපති කාර්යාලයේ පැවති විශේෂ සාකච්ඡාවේදී ජනාධිපතිතුමා මෙම තීරණවලට එළැඹිණ.

01. හෙද සරසවිය ආරම්භ කිරීම.
02. යහපාලන රජය සමයේ 2017.12.07 හා 32/2017 මගින් අත්හිටුවා ඇති මාණ්ඩලික තත්ත්වය නැවත ලබාදීම.
03. අත්හිටුවා ඇති iii ශ්‍රේණියෙන් ii ශ්‍රේණියට උසස් වීම වසර පහක් ලෙස හා ii ශ්‍රේණියෙන් i ශ්‍රේණියට වසර හතෙන් උසස් කිරීම.
04. රුපියල් විසිදහසක වාර්ෂික නිල ඇඳුම් දීමනාව ලබාදීම.
05. දැනට පැය 36ක්ව පවතින රාජකාරී කාලය සතියකට දින පහක (පැය 30ක) කාලයක් ලෙස සැලකීම විශේෂ කමිටුවක අධ්‍යයනයට යොමු කිරීම.

යන කරුණු 5 වහාම ක්‍රියාත්මක කිරීමට ජනාධිපතිතුමා තීරණය කළේය.

රුපියල් දස දහසේ දීමනාව සහ 2014.12.24 දින මුදල් අමාත්‍යාංශය චක්‍රලේඛයක් මඟින් සඳහන් කර ඇති මූලික වැටුපෙන් 1/100 අමතර සේවා දීමනාව ලබන අය වැයෙන් ලබාදීමටත් ජනාධිපතිතුමා විසින් එකඟතාව පළ කෙරිණ.

ඒ අනුව රාජ්‍ය සේවා එක්සත් හෙද සංගමය ඉදිරිපත් කළ යෝජනා සියල්ලට ජනාධිපතිතුමාගේ විසඳුම් ලැබිණ.

රජය සෞඛ්‍ය අංශය කෙරෙහි දැඩි විශ්වාසයෙන් පසුවන අතර හෙද සේවාවට ඉහළ පිළිගැනීමක් ලබාදෙන බවත් හෙද වෘත්තිකයන්ට නිසි තැන ලබා දෙන බව ද ජනාධිපතිතුමා අවධාරණය කළේය.

රාජ්‍ය සේවා එක්සත් හෙද සංගමයේ සභාපති පූජ්‍ය මුරුත්තෙට්ටුවේ ආනන්ද හිමි, සෞඛ්‍ය අමාත්‍ය පවිත්‍රා වන්නිආරච්චි, ජනාධිපති ප්‍රධාන උපදේශක ලලිත් වීරතුංග, සෞඛ්‍ය ලේකම් (විශ්‍රාමික) මේජර් ජෙනරාල් විශේෂඥ වෛද්‍ය සංජීව මුණසිංහ, සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන යන මහත්ම මහත්මීහු සහ රාජ්‍ය සේවා එක්සත් හෙද සංගමයේ නියෝජිතයෝ මේ අවස්ථාවට එක්ව සිටියහ.

– ජනාධිපති මාධ්‍ය අංශය