ශ්‍රී ලංකා ජාතික ක්‍රිකට් කණ්ඩායම නියෝජනය කරන ජ්‍යෙෂ්ඨ ක්‍රීඩකයන් 4 දෙනකු ඉදිරි වසර සඳහා වූ කොන්ත්‍රාත් අත්සන් කිරීම ප්‍රතික්ෂේප කොට තිබේ. තමන්ට මෙතෙක් ලැබුණු වැටුප් ප්‍රමාණයන් කප්පාදු කිරීම ඊට හේතුවී තිබේ. එසේ ගිවිසුම් අත්සන් කිරීම ප්‍රතික්ෂේප කොට තිබෙන්නේ ටෙස්ට් , එක්දින හා 20 – 20 ජන කණ්ඩායම්වල ශ්‍රී ලංකා නායකත්වය දරු ක්‍රීඩකයන් වීමද විශේෂත්වයකි. වත්මන් ටෙස්ට් කණ්ඩායමේ නායක මෙන්ම හිටපු එක්දින කණ්ඩායමේ නායකයා වූ දිමුත් කරුණාරත්න සමග ඇන්ජලෝ මැතිව්ස් , දිනේෂ් චන්දිමාල් හා සුරංග ලක්මාල් මෙසේ නව කොන්ත්‍රාත් අත්සන් කිරීම ප්‍රතික්ෂේප කළ ක්‍රීඩකයන් අතර වේ. මේ ක්‍රීඩකයන් 4 දෙනාම වයස අවුරුදු 30 ඉක්මවූ අය වේ. නව ක්‍රිකට් කොන්ත්‍රාත් ඉකුත් 13 වැනි දින ශ්‍රී ලංකා ක්‍රිකට් ආයතනය විසින් ප්‍රකාශයට පත් කළ අතර එහි A2 ඛණ්ඩයටඇන්ජලෝ මැතිව්ස් ඇතුළත් කර ඇති අතර A3 කාණ්ඩයට දිමුත් කරුණාරත්න ඇතුළත් කොට තිබේ.

ඇන්ජලෝ මැතිව්ස්ගේ මාසික වැටුප රු. ලක්ෂ 13 ක් වන අතර දිමුත් කරුණාරත්නගේ මාසික වැටුප රු. ලක්ෂ 11කි. සුරංග ලක්මාල් B1 කාණ්ඩයටද දිනේෂ් චන්දිමාල් C2 කාණ්ඩයටද ඇතුළත් කොට තිබේ. සුරංග ලක්මාල්ගේ මාසික වැටුප රුපියල් ලක්ෂ 10 ක් වන අතර දිනේෂ් චන්දිමාල්ගේ මාසික වැටුප රු 7,38,750 කි. නව ක්‍රිකට් කොන්ත්‍රාත් පිරිනැමීමේදී වැඩිම මුදලක් හිමිව තිබෙන්නේ A1 කාණ්ඩයට අයත් නිරෝෂන් දික්වැල්ල හා ධනංජය ද සිල්වා යන ක්‍රීඩකයන් දෙදෙනාට වන අතර ඔවුන් එක් අයකුට ඇ.ඩො ලක්ෂයක් එනම් රුපියල් ලක්ෂ දෙසියකට ආසන්න මුදලක් ලැබෙනු ඇත. එනම් මාසිකව රු ලක්ෂ 16ක වැටුපකි. ක්‍රීඩකයන් 24 දෙනෙකුට ක්‍රිකට් කොන්ත්‍රාත් ලබාදුන් අතර එසේ ලබා දීමේදී මූලික වැටුප් කප්පාදුවක් සිදු කළ බව සත්‍ය මුත් තරග ජයග්‍රහණය කරන පදනම තුළ මුදල් ලබා ලබාදෙන ක්‍රමවේදයක් මෙවර හඳුන්වා දී ඇති බව ශ්‍රී ලංකා ක්‍රිකට් ආයතනය සඳහන් කරයි. ඒ අනුව කණ්ඩායම ජයග්‍රහණය කරා ගෙන යන්නේ නම් මීට පෙර ක්‍රිකට් කොන්ත්‍රාත් වලින් ලබාගත් මුදලටත් වඩා මුදලක් ක්‍රිකට් ක්‍රීඩකයින්ට නව ක්‍රමය යටතේ ඉපයීමට හැකි බවද ශ්‍රී ලංකා ක්‍රිකට් ආයතනය වැඩිදුරටත් සඳහන් කරයි.